АҚШ Украинадан 15 майгача президентлик сайлови ва тинчлик бўйича референдум ўтказишни талаб қилмоқда. Бу ҳақда Financial Times маълумотларига таяниб Meduza хабар берди.
Маълумотларга кўра, Оқ уй баҳоргача тинчлик музокараларини якунлаш мақсадида Киевга кучли босим ўтказмоқда. Акс ҳолда Украина “АҚШ таклиф қилган хавфсизлик кафолатлари”ни қўлга кирита олмаслиги мумкин. Трамп хавфсизлик кафолатлари кенгроқ тинчлик келишуви билан боғлиқ эканини тушунтирган. Бу келишув “эҳтимол, Донбассдан воз кечишни талаб қилади” ва Вашингтон унга 15 майгача эришмоқчи.
4–5 февраль кунлари Абу Дабида бўлиб ўтган Украина, Россия ва АҚШ ўртасидаги уч томонлама учрашувдан сўнг Зеленский АҚШ урушни июнгача якунлашни хоҳлаётганини, чунки ноябрда АҚШда оралиқ сайловлар бўлиб ўтиши ва Вашингтон “шунга мувофиқ” босим ўтказиши мумкинлигини айтганди.
У Россия Донбассдан Украина қўшинларини олиб чиқишни талаб қилаётганини, бироқ Киев “қаерда турган бўлсак, ўша ерда турамиз” позициясини илгари сураётганини билдирган. Зеленскийга яқин манбалар уруш шароитида қисқа муддатда сайлов ўтказиш қийин бўлишига қарамай, президент ва жамоаси Оқ уйга ижобий сигнал берганини айтмоқда.
Украина ва Европа расмийларига кўра, Зеленский 24 февраль куни — урушнинг тўрт йиллиги муносабати билан — сайлов ва референдум ўтказилишини эълон қилмоқчи. Украина президенти сайловда ўз номзодини қўйиши эҳтимоли ҳам инкор этилмаган.
“Хавфсизлик бўлмагунча сайловлар ҳақида эълон ҳам бўлмайди”, дейди Зеленскийнинг атрофидаги манбалар.
Зеленский офиси раҳбари маслаҳатчиси Михаил Подоляк эса белгиланган сана бўйича шубҳа билдириб, сайловларни ўтказиш учун камида урушнинг фаол босқичи ва ракета-дрон ҳужумлари тўхтатилиши зарурлигини айтди. Сабаби урушнинг фаол босқичи якунланмаса, фуқаролар ва номзодлар ўз ҳуқуқларидан тўлиқ фойдалана олмаслигини таъкидлади. Бундан ташқари, Украинадаги ҳозирги вазиятни инобатга олган ҳолда овоз бериш тизимини тўлиқ қайта ташкил этиш учун катта маблағ талаб этилади.
