Россия Президенти Владимир Путин Чеченистон раҳбари Рамзан Қодировнинг ўғли Аҳмад Қодировга миннатдорлик билдирди. Давлат раҳбарининг фармойиши ҳуқуқий ахборот порталида эълон қилинган.
Ҳужжатда айтилишича, у жисмоний тарбия ва спорт соҳасидаги хизматлари ҳамда узоқ йиллик ҳалол меҳнати учун рағбатлантирилган.
Маълумот учун, Аҳмад Қодиров 2005 йилда туғилган. У 2022 йилдан буён Чеченистон Республикаси раҳбарининг маслаҳатчиси лавозимида ишлаган, шунингдек, Россиянинг Болалар ва ёшлар ҳаракати – “Биринчилар ҳаракати”нинг ҳудудий бўлинмаси кенгаши раиси бўлган.
2023 йил ноябрь ойида Аҳмад республиканинг Жисмоний тарбия, спорт ва ёшлар сиёсати вазирининг биринчи ўринбосари этиб тайинланган. 2024 йил 17 февралда Чеченистон Республикасининг ёшлар ишлари вазири лавозимини эгаллаган. 2024 йил 21 майда Чеченистон Республикасининг Жисмоний тарбия ва спорт вазири этиб тайинланган. Шунингдек, у Чеченистон Республикасида ёшлар сиёсати соҳасида хизмат кўрсатган ходим унвонига эга.
Чеченистон раҳбарининг бошқа ўғли, 18 ёшли Адам Қодиров, 2025 йил баҳоридан буён республика Хавфсизлик кенгаши котиби лавозимида ишламоқда. Қодировнинг қизи Ойшат эса маҳаллий ҳукумат раиси ўринбосари лавозимини эгаллайди.
