Қашқадарё вилояти Кўкдала туманида жамоат жойида синфдош аёлга нисбатан майда безорилик қилган эркак 14 суткага қамалди.
Аниқланишича, 1995-йилда туғилган Б. Б. жорий йилнинг 14 ноябрь куни Хоразм вилоятига турмушга чиққан синфдоши Г. М.ни йўлда қўриб қолиб, уни ота уйига олиб бориб қўйишини айтиб, ўзининг автомашинасига ўтқиздирган. Б.Б. йўлда кетаётган вақтида маҳалла ҳудудидан ўтган қатнов йўлининг четида автомашинасини тўхтатиб, Г.М.нинг қўлидан ушлаб, севишини айтган ва уни ўпмоқчи бўлган.
Суриштирув органи дастлаб унинг қилмишини Маъмурий жавобгарлик тўғрисидаги кодекснинг 41-1-моддаси (шаҳвоний шилқимлик қилиш) бўйича баҳолаган. Бироқ суд ҳолатни ўрганиб чиқиб, унинг ҳаракатларини “майда безорилик” сифатида қайта квалификация қилган ва Маъмурий жавобгарлик тўғрисидаги кодекснинг 183-моддаси (майда безорилик) бўйича айбли деб топган. Унга нисбатан 14 сутка маъмурий қамоқ жазоси тайинланган.
