Хитой раҳбари Си Цзиньпин энг юқори мартабали генералларни лавозимдан четлатиш орқали қуролли кучлар устидан назоратни амалда ўз қўлига олди. Эндиликда Пекиннинг Тайван билан боғлиқ яқинлашиб келаётган қарама-қаршилигида қайси йўл танланишини фақат Сининг қараши белгилайди. Бу ҳақда Wалл Стреет Жоурнал хабар берди.
Хитойда Цзиньпин “катта ака” деб атаган ва унинг болаликдаги дўсти бўлган генерал Чжан Юся ҳибгса олинди. Шу тариқа Хитой етакчиси Тайван масаласида уни тўхтатиб қолиши мумкин бўлган ички нуфузли овозларнинг деярли барчасини йўқ қилди. Хитой Тайванни ўз ҳудуди деб ҳисоблайди, бироқ орол ўзини мустақил деб билади.
Хитой ҳарбийлари 2027-йилгача ”модернизация”га шошилмоқда, бу кўпинча Тайвандаги фавқулодда вазиятга тайёрлик сифатида талқин қилинади. Ташқи сиёсий ва ҳарбий таҳлилчилар фикрича, Тайванга яқин келажакда бостириб кириш эҳтимоли камроқ. Чунки Си Цзиньпин атиги уч йил олдин армияга раҳбарлик қилиш учун танлаган олти нафар юқори мартабали генералдан бештасини четлатди.
“Си Цзиньпин Тайваннинг қатъиятини ўқ узмасдан синдиришга мўлжалланган кампанияга ўтмоқда”, деди таҳлилчилар.
Таъкидланишича, Хитой очиқ уруш чегарасидан паст бўлган босим усулларига тобора кўпроқ таянади. Бунга Тайванни денгиз ва ҳаво орқали блокадага олишни машқ қилувчи узлуксиз ҳарбий машғулотлар ҳам киради. Бу Пекиннинг психологик босимини кучайтиришга қаратилган.
“Ҳозирги вақтда Цзиньпиннинг позицияси ҳарбий мавқени иқтисодий ва кибер босим билан уйғунлаштирадиган кенг қамровли мажбурлаш кампаниясидан иборат”, деди собиқ президент Жо Байден даврида АҚШнинг Тайвандаги бош элчиси ва миллий хавфсизлик бўйича юқори лавозимли амалдори бўлган Лора Розенбергер.
Шунингдек, Пекин “ҳуқуқий уруш” орқали янги йўналишни очмоқда. У Тайван амалдорларини нишонга олиш учун Хитойнинг ички қонунчилигидан фойдаланмоқда. Аввал оддий сиёсий фаолият ҳисобланган ҳаракатлар энди жиноят сифатида талқин қилиниши мумкин.
Тайван расмийлари таъкидлашича, Хитой мамлакатнинг энергетика ва соғлиқни сақлаш инфратузилмасини ишдан чиқаришга қаратилган киберҳужумларни амалга оширмоқда.
“Шу билан бирга, Пекиннинг Япония каби давлатларни қўрқитиши Тайванни дипломатик жиҳатдан яккалаб қўйишга қаратилган”, дейилади хабарда.
Хулосага кўра, Хитой ҳарбий раҳбарияти ўзгариб турса-да, Си Цзиньпиннинг Тайванга бўлган эътибори сусаймаган. Унинг Тайваннинг таъминот йўлларини узиш ва иқтисодий чидамлилигини ҳолдан тойдириш салоҳияти ҳамон сақланиб қолмоқда. Си Цзиньпиннинг Чжанни лавозимидан четлатиш сабаблари 24 январда эълон қилинган бўлса-да, ҳамон жумбоқлигича қолмоқда.
Шунингдек, яна бир юқори мартабали ҳарбий шахс, генерал Лю Чженли ҳам тергов остида эканини аниқланди. Бу қарор октябрь ойида тўққиз нафар юқори мартабали генералнинг сафдан чиқарилиши ортидан қабул қилинди. Бу сўнгги ўн йилликларда армияга қарши амалга оширилган энг йирик “тозалаш”лардан бири ҳисобланади.
