Шимоли Корея ўзининг еттинчи ядровий синовини ўтказишга тайёр. Бунга мамлакат раҳбари Ким Чен Ин буйруқ берса бўлгани. Мазкур маълумот Жанубий Корея разведкаси томонидан 5 ноябрь куни тақдим этилди.
Мудофаа разведкаси агентлигига кўра, Ким Чен Ин қисқа вақт ичида Пунгеридаги 3 сонли туннелда синов ўтказишга буйруқ бериши кутилмоқда. Шимолий Корея сўнгги марта 2017 йилда ер остида ядро синовини ўтказган эди.
Маълум қилинишича, Пхеньян ядро материалларини йиғиш ишларини кучайтирган ва турли хилдаги ядро каллакларини ишлаб чиқарувчи заводларни барпо этмоқда. Бундан ташқари, мамлакат Россия техник ёрдами билан янги жосус сунъий йўлдошини учиришга тайёргарлик кўрмоқда. Мазкур техника илгарисига қараганда юқори аниқликдаги суратлар олиш имконига эга бўлади.
Шимолий Корея 2023 йил ноябрь ойида ўзининг биринчи ҳарбий жосус сунъий йўлдоши — Malligyong-1 ни орбитага учирганди. Мамлакат 2024 йилда яна учта шундай сунъий йўлдош учиришни режалаштирганди. Бироқ 2024 йил май ойида навбатдаги сунъий йўлдошни олиб учган ракета ҳавога кўтарилган заҳоти портлаб кетган.
Сеул расмийларига кўра, Пхеньян ҳозирда ёпилган Кесон саноат мажмуасининг айрим қисмларини қайта ишга туширган бўлиб, у ерда кундалик ҳаёт учун зарур буюмлар ишлаб чиқарилмоқда.
