Google корпорацияси Project Suncatcher (“Қуёш тутгич”) номли янги тадқиқот лойиҳасини тақдим этди. Бу ташаббус сунъий интеллект (СИ) тизимларини ўқитиш ва ишлатиш учун зарур бўлган улкан электр энергияси эҳтиёжини қоплашга қаратилган. Бу ҳақда “The Verge” хабар берди.
Лойиҳага кўра, Google ўзининг СИ чипларини Ер орбитасига чиқарилган сунъий йўлдошларга ўрнатмоқчи. Улар қуёш панеллари билан жиҳозланади ва шу тариқа космик серверлар деярли суткалик узлуксиз қуёш энергияси билан ишлайди. Ҳисоб-китобларга кўра, орбитадаги панеллар Ерда ўрнатилган панелларга қараганда саккиз баравар самаралироқ бўлади.
Бу ёндашув Google’га сунъий интеллект бўйича ишланмаларни ривожлантириш билан бирга атмосфера ифлосланиши ва энергия сарфи бўйича хавотирларни камайтириш имконини беради. Компания ушбу соҳада эришилган натижалар ҳақида батафсил маълумот берувчи олдиндан чоп этилган илмий ҳисоботни эълон қилган.
Лойиҳадаги энг муҳим муаммолардан бири – сунъий йўлдошлар орасидаги барқарор ва тезкор алоқани таъминлаш. Ҳисоботда айтилишича, орбитадаги маълумот узатиш тезлиги сониясига ўнлаб терабит бўлиши керак. Бунинг учун йўлдошлар бир-биридан бир неча километр ёки ундан яқин масофада жойлаштирилади.
Шунингдек, Google муҳандислари чипларнинг космик радиацияга чидамлилигини синовдан ўтказмоқда. Триллиум номли СИ чипларининг дастлабки тестлари улар беш йиллик космик хизмат давомида сезиларли носозликсиз ишлаши мумкинлигини кўрсатган.
Ҳозирча бундай тизимларни орбитага чиқариш жуда қиммат. Бироқ Google ҳисоб-китобларига кўра, 2030 йилларнинг ўрталарига бориб, космик дата-марказларни ишга тушириш ва ишлатиш харажатлари Ерда жойлашган марказларникига тенглашиши мумкин.
Google 2027 йилда Planet компанияси билан ҳамкорликда икки прототип йўлдошни орбитага чиқариш орқали ускуналарни синовдан ўтказишни режалаштирмоқда.
