Хитой Фанлар академияси олимлари сунъий интеллект ёрдамида 2 миллиондан ортиқ сейсмограммани таҳлил қилиб, Ернинг қуйи мантиясида, тахминан 2900 километр чуқурликда илгари маълум бўлмаган олтита ўзига хос ҳудудни аниқлади.
Тадқиқот давомида сўнгги 34 йил ичида магнитудаси 6,0 ва ундан юқори бўлган зилзилалар вақтида қайд этилган маълумотлар чуқур ўрганиш нейрон тармоқлари орқали қайта ишланган. Натижада илгари аниқланмаган 175 мингга яқин заиф сейсмик сигнал топилган.
Ушбу сигналлар Ер ядроси ва мантияси чегарасидаги кичик структуравий аномалиялар ҳақида маълумот беради. Янги таҳлил аввал алоҳида деб ҳисобланган айрим зоналар аслида йирик ва яхлит тузилмаларнинг қисмлари бўлиши мумкинлигини кўрсатган.
Ҳозирча аниқланган тузилмаларнинг келиб чиқиши номаълум. Олимлар улар қадимда Ер қаърига чўкиб кетган тектоник плиталар қолдиқлари, қисман эриган моддалар жойлашган зоналар ёки улкан босим таъсирида минералларда юз берган ўзгаришлар бўлиши мумкинлигини тахмин қилмоқда.
Мутахассисларнинг фикрича, ушбу кашфиёт Ернинг ички тузилиши, мантиядаги моддалар ҳаракати ҳамда ядро ва мантия ўртасидаги ўзаро таъсирни яхшироқ тушунишга ёрдам бериши мумкин. Шунингдек, келгусида бу маълумотлар Ер қаъридаги жараёнларнинг вулқон фаоллигига таъсирини ўрганишда қўл келиши кутилмоқда.
