Франция терма жамоаси собиқ футболчиси, жаҳон ва Европа чемпиони Зинедин Зидан “Реал Мадрид”ни бошқариш имкониятидан воз кечди. Бу ҳақда инсайдер Фабрицио Романо хабар берди.
Инсайдернинг сўзларига кўра, “Реал Мадрид” раҳбарияти бу мутахассисни кўриб чиққан, аммо Зидан устувор мақсад сифатида Франция терма жамоасида ишлашни танлаган. Маълумотларга кўра, Зидан Франция терма жамоаси билан оғзаки келишувга эга. 2026 йилги Жаҳон чемпионатидаги ҳар қандай натижадан сўнг Дидье Дешам лавозимини тарк этади ва Зидан терма жамоа бошқарувини эгаллайди.
Таъкидланишича, 2021 йилдаги бироз низоли ажралишга қарамай, “Реал Мадрид” ва Зидан ўртасидаги муносабатлар ижобийлигича қолмоқда. Шунга қарамай, клуб раҳбарияти ҳозирча уни мураббийлик лавозими учун асосий вариант сифатида кўриб чиқолмайди.
Мадрид ички манбаларига кўра, агар Хаби Алонсо лавозимидан озод этилса, унинг ўрнига Сантьяго Солари ёки Альваро Арбелоа номзодлари кўриб чиқилиши мумкин.
Маълумот учун, Зидан “Реал Мадрид”ни 2016 йилдан 2018 йилгача ва 2019 йилдан 2021 йилгача бошқарган. Зидан бу давр мобайнида Ла Лига, Испания Суперкубоги, Чемпионлар лигаси, UEFA Суперкубоги ва Қитъалараро кубокда ғалаба қозонган.
