“Ал-Насср” ҳужумчиси ва сардори Криштиану Роналду Саудия Арабистони Пролигаси 7-туридан ўрин олган “Ал-Фейҳа”га қарши ўйиндан (2:1) сўнг ўз фикрларини билдирди. 40 ёшли португалиялик футболчи ушбу учрашувда дубль муаллифи бўлди.
“Бугун мен учун ҳам, жамоам учун ҳам ажойиб кеча бўлди. ‘Ал-Насср’ ғалаба қозонди, мен эса икки гол урдим — бу жуда муҳим.
Ҳар доим айтаман: спортдаги узоқ умр фақат иштиёқ орқали эришилади. Мен ҳали ҳам шу иштиёқ билан яшамоқдаман. Гол урсам ҳам, урмасам ҳам — бу менинг ҳаётим. Мен сўнгги 23–24 йил ичида футбол билан яшаяпман, шунинг учун оёқларим югириб турса, мен ўйнашни давом этаман”, деди Роналду УОЛ нашрига берган интервьюсида.
Маълумот учун, Роналду жорий мавсум Саудия Пролигаси доирасидаги 7 та ўйинда майдонга тушиб, ўз ҳисобига 8 та гол ёздириб қўйган. Умуман олганда, ҳужумчи бутун карераси давомида 952 та гол муаллифига айланган. Португалиялик футболчи 1000 та гол уришни мақсад қилган.
Криштиану Роналду фаолияти давомида “Спортинг”, “Манчестер Юнайтед”, “Реал Мадрид” ҳамда “Ювентус” клублари шарафини ҳимоя қилган. Шунингдек, у Португалия терма жамоаси сафида Икки карра Миллатлар Лигаси ҳамда 2016-йилги Европа чемпионати ғолиблигини қўлга киритган.
