Тошкентда фуқарони Туркияга сотиб юбормоқчи бўлган аёллар ушланди. Бу ҳақда Наманган ИИБ ахборот хизмати хабар қилди.
Қайд этилишича, Давлатобод тумани ва Наманган шаҳрида яшовчи икки нафар аёл олдиндан тил бириктирган ҳолда, турмушидан ажраган ёш аёлларни чет давлатига, хусусан, Туркияга фоҳишалик қилиш учун жўнатишга ҳаракат қилаётгани тўғрисида тезкор маълумот олинган.
Улар Янги Наманган туманида яшовчи 2001-йилда туғилган қизни турли ваъдалар ва ёлғон маълумотлар орқали ишончига кириб, Тошкент халқаро аэропорти орқали Туркиянинг Анқара шаҳрига фоҳишалик қилиш учун юбораётган вақтида ходимлар томонидан қўлга олинди.
Мазкур ҳолат бўйича жиноят иши очилиб, ҳозирда тергов ҳаракатлари олиб борилмоқда.
