Фарғонада 16 ёшли йигит Қўқон шаҳар 1-сон ИИБ профилактика инспекторини пичоқлади. Бу ҳақда Бош прокуратура матбуот котиби Ҳаёт Шамсутдинов хабар қилди.
Дастлабки маълумотларга кўра, воқеа 18 февраль куни бола яшаётган уйда содир бўлган. 9-синф ўқувчиси бўлган Ў.Ў. профилактика инспектори билан ўзаро жанжаллашиб, унга ошхона пичоғи билан тан жароҳати етказган. Инспектор оғир аҳволда шифохонага ётқизилган.
Ҳолат юзасидан вояга етмаган Ў.Ў.га нисбатан Жиноят кодексининг 104-моддаси (ўз хизмат ёки фуқаролик бурчини бажариши муносабати билан шахсга қасддан баданига оғир шикаст етказиш) 2-қисми “б” банди билан билан жиноят иши қўзғатилиб, Жиноят процессуал кодексининг 221-моддаси тартибида ушланган. Ушбу модда билан айбдор деб топилганлар 5 йилдан 8 йилгача озодликдан маҳрум қилиш билан жазоланади.
Ҳозирда жиноят иши юзасидан Қўқон шаҳар прокуратураси томонидан дастлабки тергов ҳаракатлари олиб борилмоқда.
