Жанубий Корея собиқ президенти Юн Сок Ёл умрбод қамоқ жазосига ҳукм қилинди. У 2024 йил охирида ҳарбий ҳолат жорий этиши муносабати билан исён уюштиришда айбдор деб топилди. Бу ҳақда Yonhap хабар берди.
Юн Сок Ёл 2022 йил майидан президент лавозимида ишлаган. 2024 йил декабрида у қисқа муддатга ҳарбий ҳолат жорий этгани ортидан исёнда гумонланиб, Миллий ассамблея томонидан лавозимидан четлатилган. Импичмент 2025 йил апрелида тасдиқланган, у эса бир неча муваффақиятсиз уринишлардан сўнг ҳибсга олинган.
2026 йил январида суд Юн Сок Ёлни ҳокимиятни суиистеъмол қилиш ва ҳибсга олишга қаршилик кўрсатиш айбловлари билан 5 йилга озодликдан маҳрум этди. Прокурорлар унга нисбатан исёнга ундаш айблови бўйича ўлим жазоси тайинлашни сўраганди.
