Россия Ташқи ишлар вазирлиги матбуот котиби Мария Захарова таниқли тележурналист Владимир Соловёвнинг Марказий Осиё ва Арманистон бўйича айтилган фикрлари юзасидан баёнот берди.
Захарованинг таъкидлашича, россиялик журналистнинг фикрлари Россиянинг расмий позициясини акс эттирмайди ва у буни ўзининг хусусий телеканалида билдирган.
“Мен иқтибосларни ўқиб чиқдим, журналист билдирган фикрлар унинг шахсий фикри. Бу Москванинг расмий позициясини акс эттирмайди. Унинг фикри аслида савол шаклида баён қилинган. Бу баёнот эмас, балки саволдир. Бундан ташқари бу жумлалар таҳлилчилар томонидан провокацион тарзда талқин қилинаётгани яққол аён. Бундай манипуляциялар билан шуғулланишга шунчаки йўл қўйиб бўлмайди.
Шу муносабат билан яна бир бор таъкидламоқчиманки, расмий позицияни бунга ваколатли бўлган расмий шахслар билдиради”, деди рус расмийси.
У Россияни Жанубий Кавказ ва Марказий Осиё давлатлари халқлари билан тарихан яхши қўшничилик, стратегик шериклик, иттифоқчилик, биродарлик дўстлиги ва ҳамкорлик муносабатлари боғлаб туришини билдирди. Шунингдек, ўзаро ҳурмат ва ишончга асосланган дўст давлатлар раҳбарлари ўртасидаги самимий шахсий алоқалар муносабатларимизнинг изчил ривожланишининг гарови экани таъкидланди.
“Ҳозирги суверен давлатлар билан муносабатлар контекстидаги сиёсатимиз борасида Россия раҳбарияти томонидан ўнлаб марта маълум қилинган. Яна бир бор айтаман, бу позиция, менимча, Россия президенти, ҳукумат раиси, ташқи ишлар вазири, мудофаа вазири, барча йўналишлардаги вазирлар томонидан ўн минглаб марта айтилган. Бизда МДҲ, КХШТ каби посцовет ҳудудида мавжуд бўлган тузилмалар орқали ҳам мулоқот мунтазам равишда қўллаб-қувватланади”, деди Захарова сўзининг охирида.
Таъкидлаш жоизки, Владимир Соловёв ўз чиқишларида Арманистон ва Марказий Осиё минтақаси мамлакатларидаги сиёсий жараёнлар ҳамда уларнинг ташқи сиёсатига доир кескин мулоҳазалар билдирган эди.
Аниқроқ айтганда, у ушбу ҳудудни Россия учун Сурия ёки Венесуэладан кўра муҳимроқлигини айтиб, “махсус ҳарбий амалиёт” ўтказишга чақирганди. Бу эса мазкур давлатлар жамоатчилиги ва расмий доираларида турли муҳокама ҳамда эътирозларга сабаб бўлди.
