Покистоннинг Балужистон вилоятидаги кўмир конида портлаш юз берди. Ҳодиса оқибатида камида 32 нафар кончи ҳалок бўлди. Бу ҳақда расмийларга таяниб Al Jazeera хабар берди.
Ҳодиса 30 июль куни Кветта шаҳри яқинидаги Соранге конида содир бўлган. Дастлабки маълумотларга кўра, портлашга метан газининг тўпланиши сабаб бўлган.
“Ҳозирча 29 та жасадни топдик. Қутқарувчиларимиз шахта ичида яна учта жасадни аниқлади ва уларни олиб чиқишга ҳаракат қилмоқда”, деди 31 июль куни вилоят табиий офатларни бошқариш бошқармаси расмийси.
Ҳодисадан 12 соатдан ортиқ вақт ўтганига қарамай, бошқарма ходимлари ва бошқа қутқарувчилар кончиларни қидиришда давом этмоқда. Бироқ тирик қолганларни топиш эҳтимоли жуда паст экани айтилмоқда.
Портлаш вақтида шахта ичида 36 нафар кончи бўлган. Кучли портлаш оқибатида бир-бирига яқин жойлашган иккита кон шикастланган.
Покистоннинг кўмир қазиб олиш саноатида, айниқса, Балужистонда бундай бахтсиз ҳодисалар тез-тез учраб туради. Бунга вентиляция, газ назорати тизимлари ва бошқа асосий хавфсизлик чораларининг етарли даражада йўлга қўйилмагани сабаб бўлмоқда. Хавф-хатар ва паст маошларга қарамай, Покистоннинг энг йирик, бироқ энг кам ривожланган вилояти ҳисобланган Балужистонда минглаб кончилар тирикчилик учун кўмир саноатига таянади.
