Тошкент шаҳрининг Мирзо Улуғбек туманида яшовчи ёлғиз кекса аёл Ижтимоий қўллаб-қувватлаш марказига жойлаштирилди. Бу ҳақда ИҲМА ахборот хизмати хабар қилди.
Қайд этилишича, ижтимоий тармоқларда Ҳабиб Абдуллаев маҳалласида яшовчи фуқаро Л.Журавлёванинг яшаш шароити акс этган видеомурожаат Ижтимоий ҳимоя миллий агентлиги томонидан назоратга олинган.
Тиббий кўрик якунларига кўра, 1940 йилда туғилган аёлга когнитив бузилишлар, томирли деменция ҳамда тарқоқ остеохондроз ташхислари қўйилган. Аёлнинг хотираси, фикрлаши ва атроф-муҳитда мўлжал олиш қобилияти сустлашиб, мустақил овқатланиш ҳамда кундалик эҳтиёжларини қондира олмаслиги маълум бўлган.
Шунингдек, у ёлғиз қолганда ўзига ва атрофдагиларга зарар етказиш хавфи юқорилиги (газ жиҳозларидан нотўғри фойдаланиш, эшикни очиқ қолдириш) инобатга олиниб, 24 соатлик парвариш кўрсатиладиган Ижтимоий қўллаб-қувватлаш марказига жойлаштирилган. Ҳозирда унинг соғлиғи барқарор.
Шу билан бирга, туман “Инсон” маркази ва тиббиёт бирлашмаси ходимларидан иборат мониторинг гуруҳи аёлнинг аҳволи оғирлашиб бораётганини ўз вақтида аниқламагани ҳамда унга доимий парваришга муҳтожлик даражасини белгиламагани сабабли тегишли масъуллар эгаллаб турган лавозимидан озод этилган.
