Автомобил ва эҳтиёт қисмлари савдоси соҳасида фаолият юритувчи 30 нафардан ортиқ афғонистонлик тадбиркор Тошкент шаҳрига ташриф буюриб, ушбу йўналишдаги савдо инфратузилмаси ва ҳамкорлик имкониятлари билан танишмоқда.
Ташриф дастурининг биринчи қисмида делегация аъзолари Сергелидаги фойдаланилган транспорт воситалари ва эҳтиёт қисмлари бозори, Tashkent Index савдо мажмуаси ҳамда Banner Print МЧЖ фаолияти билан танишди.
Меҳмонларга пойтахтда автомобил ва эҳтиёт қисмлари савдосини ривожлантириш бўйича амалга оширилаётган ишлар, тадбиркорлар учун яратилган шароитлар ҳамда Ўзбекистон ва Афғонистон ўртасидаги савдо-иқтисодий ҳамкорликни кенгайтириш истиқболлари ҳақида маълумот берилди.
Шунингдек, ташриф доирасида икки давлат тадбиркорлари ўртасида янги ишбилармонлик алоқаларини йўлга қўйиш ва ўзаро манфаатли лойиҳаларни муҳокама қилиш режалаштирилган. Афғонистонлик тадбиркорлар делегациясига Тошкент шаҳар ҳокимлиги ҳамда Савдо-саноат палатаси вакиллари ҳамроҳлик қилмоқда.
