Тошкент метрополитенининг “Чинор” метро бекати реконструкция қилиниши муносабати билан 13 июндан бошлаб 50 кунга ёпилади. Бу ҳақда “Тошкент метрополитени” ДУК хабар берди.
Маълум қилинишича, лойиҳа доирасида бекатнинг кириш ва чиқиш қисмлари кенгайтирилади, аҳолининг барча қатламлари, жумладан, ёши улуғ фуқаролар, ногиронлиги бўлган шахслар ҳамда болали оилалар учун 4 та катта сиғимли замонавий лифт ўрнатилади. Шунингдек, йўловчиларга хизмат кўрсатиш сифатини янада ошириш мақсадида қўшимча 12 та турникет ўрнатилиши режалаштирилган.
Шу муносабат билан, реконструкция ишларини хавфсиз ва сифатли амалга ошириш мақсадида жорий йилнинг 13 июнь санасидан бошлаб “Чинор” метро бекати 50 кун муддатга, яъни 1 августгача йўловчилар учун вақтинча ёпилади.
Корхона реконструкция ишларига Бош вазир ўринбосари Очилбой Раматовнинг Вазирлар Маҳкамасида 2026 йил 30 апрель куни ўтказилган 25-сон йиғилишида берган топшириқларини асос қилиб келтирган.
Қайд этилишича, ноқулайликни олдини олиш ва транспорт қатновининг узлуксизлигини таъминлаш мақсадида “Чинор” ва “Янгиҳаёт” метро бекатлари ўртасида, бир бекат масофасида махсус метробуслар қатнови йўлга қўйилади. Метробуслар белгиланган жадвал асосида ҳаракатланиб, йўловчиларнинг манзилларига ўз вақтида етиб боришларига хизмат қилади.
