Тошкент вилоятидаги Туябўғиз сув омборида электр токи ёрдамида ноқонуний балиқ овлаган икки нафар шахсга нисбатан суд ҳукми чиқарилди. Бу ҳақда Экология ва иқлим ўзгариши миллий қўмитаси хабар берди.
Маълум қилинишича, идора ходимлари томонидан ўтказилган тунги рейд давомида сув омбори ҳудудида электр токи ёрдамида ноқонуний балиқ овлаш ҳолати аниқланган. Қоидабузарлар 22 дона балиқни ноқонуний равишда тутгани қайд этилиб, табиатга 165 миллион сўм миқдорида зарар етказилгани аниқланган. Ҳолат юзасидан тўпланган ҳужжатлар тегишли тартибда судга юборилган.
Мазкур иш Жиноят ишлари бўйича Ўрта Чирчиқ туман судида кўриб чиқилди. Суд қарорига кўра, икки нафар ҳуқуқбузар Жиноят кодексининг 202-моддаси 4-қисмида назарда тутилган жиноятни содир этганликда айбли деб топилди. Улардан бири 3 йил 9 ой, иккинчиси эса 4 йил муддатга озодликдан маҳрум қилинди. Шунингдек, етказилган моддий зарар ундирилиши белгиланди.
Қўмита маълумотига кўра, 11 мартдан 31 майга қадар Амударё ва Сирдарёда, 26 апрелдан 10 июнгача Қорақалпоғистон Республикаси ҳамда Хоразм вилоятидаги табиий сув ҳавзаларида балиқ овлаш тақиқланган. Бошқа барча табиий сув ҳавзаларида эса 16 апрелдан 31 майгача балиқ овлашга тақиқ қўйилган.
Таъкидланишича, Экология ва иқлим ўзгариши миллий қўмитаси Давлат экологик назорат инспекцияси ҳамда ҳудудий бошқармалар томонидан ноқонуний балиқ овлашга қарши рейд тадбирлари тун-у кун давом эттирилмоқда. Тақиқланган даврда балиқ овлаш қонунчиликка мувофиқ жавобгарликка сабаб бўлади.
