Навоий вилоятида жарима майдонига жойлаштирилган юк машинасини чиқариб олиш мақсадида ЙПХ инспекторига пора таклиф қилган шахс қўлга олинди. Бу ҳақда Ички ишлар вазирлиги хабар берди.
Маълум қилинишича, 25 май куни Кармана туманидаги “Самарқанд” мунтазам йўл-патруль хизмати масканида ҳаракатланиб келаётган юк автомашинаси тўхтатилиб, текширувдан ўтказилган. Текширув давомида 1990 йилда туғилган самарқандлик ҳайдовчи транспорт воситасини рухсатномада кўрсатилган йўналишдан четга чиқиб бошқаргани аниқланган.
Ҳолат юзасидан ҳайдовчига нисбатан Маъмурий жавобгарлик тўғрисидаги кодекснинг 125-1-моддаси (юк ташиш қоидаларини, шатакка олиш қоидаларини бузиш) 4-қисмига асосан маъмурий баённома расмийлаштирилган. Юк машинаси эса вақтинча сақлаш майдонига жойлаштирилган.
Шундан сўнг фуқаро Йўл ҳаракати хавфсизлиги хизмати маъмурий амалиёт марказига мурожаат қилган. У ўзига нисбатан тузилган баённомани ҳал қилиб бериш ҳамда юк машинасини жарима майдонидан чиқариш эвазига масъул инспекторга минг доллар миқдорида пора таклиф қилган.
Ходимнинг билдиргиси асосида тезкор тадбир ташкил этилган. Тадбир давомида фуқаро маъмурий амалиёт маркази биносида пулнинг бир қисми сифатида 7 миллион 100 минг сўмни инспекторга пора тариқасида бераётган вақтида ашёвий далиллар билан ушланган.
Ҳозирда мазкур ҳолат юзасидан жиноят иши қўзғатилган. Дастлабки тергов ҳаракатлари олиб борилмоқда.
