2005 йилги “Олтин тўп” соҳиби Роналдиньо 46 ёшида профессионал фаолиятини қайта тиклайди ва Италиянинг “Равенна” клуби билан шартнома имзолайди. Бу ҳақда футболчининг ўзига таяниб, “La Gazzetta dello Sport” нашри хабар берди.
Манбага кўра, Роналдиньонинг расмий тақдимоти жорий йилнинг 23 июнь куни Майами шаҳрида бўлиб ўтади. Шундан сўнг, бразилиялик футболчи жамоанинг йиғинларида иштирок этиб, мураббийлар штаби билан мавсумолди тайёргарлик машғулотларини бошлайди. “Равенна” клубини тадбиркор Иньяцио Чиприани бошқаради.
“Янги ранглар, ўша табассум. Мен яна тўп билан рақс тушишни ва Иньяцио ҳамда Чиприани оиласи билан янги тарих ёзишни интиқлик билан кутяпман. Футбол мен учун ҳар доим қувонч манбаи бўлиб келган ва мен шу руҳни Равеннага олиб келмоқчиман”, дейди Роналдиньо.
Ўтган мавсумда “Равенна” С серияси В гуруҳида 73 очко жамғариб, учинчи ўринни эгаллаган ва В сериясига чиқиш учун плей-офф йўлланмасини қўлга киритган. Бироқ жамоа 1/8 финалда “Читтаделла”га мағлуб бўлган.
Маълумот учун, Роналдиньо фаолияти давомида “Гремио”, “Пари Сен-Жермен”, “Барселона”, “Милан”, “Фламенго”, “Атлетико Минейро”, “Керетаро” ва “Флуминенсе” жамоаларининг шарафини ҳимоя қилган. У профессионал футболчилик фаолиятини 2015 йилда якунлаган эди. Бразилия терма жамоаси сафида Роналдиньо 1999 йилги Америка Кубоги, 2002 йилги Жаҳон чемпионати ва 2005 йилги Конфедерациялар кубогида ғолиб чиққан. Шунингдек, у 2005 йилда “Олтин тўп” мукофотини қўлга киритган.
