Халқаро спорт тадқиқотлари маркази (CIES) дунёнинг энг қиммат футболчилари рейтингини эълон қилди. Янгиланган рейтингга кўра, “Барселона” ва Испания терма жамоаси футболчиси Ламин Ямаль жаҳоннинг энг қиммат футболчиси деб топилди.
CIES талқинига кўра, 18 ёшли қанот ҳужумчисининг трансфер қиймати 358 миллион евро деб баҳоланган.
Рейтингда иккинчи ўринни “Манчестер Сити” ҳужумчиси Эрлинг Ҳоланд эгаллади. Унинг трансфер қиймати 227 миллион еврони ташкил этади. Учинчи поғонадан эса “Реал Мадрид” ҳужумчиси Килиан Мбаппе жой олган бўлиб, унинг қиймати 166 миллион еврога баҳоланмоқда.
Маълум қилинишича, рейтингда Ямаль ва Ҳоланддан ташқари ҳеч бир футболчининг трансфер қиймати 200 миллион евродан ошмаган.
Мутахассислар футболчиларнинг бозор қийматидаги энг катта ўзгаришларни ҳам қайд этган. “Лейпциг” клубининг кот-д’ивуарлик ярим ҳимоячиси Ян Диоманденинг қиймати январь ойидан буён 75 миллион еврога ошиб, 119 миллион еврога етган ва бу энг катта ўсиш сифатида қайд этилган.
Аксинча, Александр Исакнинг қиймати 54 миллион еврога камайган бўлиб, ушбу даврдаги энг катта пасайиш сифатида баҳоланган.
