Мадриднинг “Реал” клуби “Ювентус”нинг 20 ёшли ҳужумчиси Кенан Йилдизни ўз сафига қўшиб олишни режалаштирмоқда. Бу ҳақда футболчининг агенти Жованни Бранчини Tuttomercatoweb нашрига берган интервьюсида маълум қилди.
Агентнинг сўзларига кўра, “қироллик клуби” бош мураббийи Хаби Алонсо Йилдиз трансферини амалга ошириш учун Килиан Мбаппедан бошқа исталган футболчини сотишга тайёр.
Футболчининг келажаги “Ювентус”нинг натижаларига боғлиқ бўлади. Агар клуб кейинги мавсум Чемпионлар Лигасига чиқа олмаса ёки қандайдир соврин қўлга кирита олмаса, жамоа билан хайрлашишга қарор қилиши мумкин.
Агар Йилдиз “Реал”га ўтишга қарор қилса, туринликлар футболчи учун камида 100 миллион евро атрофида сўраши мумкинлиги тахмин қилинмоқда. Transfermarkt портали футболчининг қийматини 75 миллион евро деб баҳолаган.
Маълумот учун, жорий мавсум Кенан Йилдиз “Ювентус” сафида жами 14 та ўйинда майдонга тушиб, ўз ҳисобига 5 та гол ва 6 та голли узатма ёздириб қўйган. Унинг туринликлар билан амалдаги шартномаси 2029 йил ёзигача мўлжалланган.
