Самарқанд вилояти Булунғур тумани мактабгача ва мактаб таълими бўлими ходими мактаб ўқитувчисига шилқимлик қилгани учун 5 суткага қамалди.
Маълум бўлишича, бўлим мутахассиси 2026-йилнинг 27 апрель куни мактаб ҳудудида ўқитувчи аёлга ёқтириб қолганини айтиб, уйланишини билдирган ҳамда унга яқин муносабатда бўлишни таклиф қилган. Шундан кейин ўқитувчи аёл мактабга укасини чақирган.
Натижада мутахассис ҳамда ўқитувчининг укаси ўртасида келишмовчилик келиб чиққан. Ука бўлим ходимини шаъни ва қадр-қимматини камситувчи сўзлар билан ҳақорат қилган. Бундан ташқари ўқитувчи ҳам Telegram орқали туман бўлими мутахассисига ҳақоратомуз сўзлар ёзгани аниқланган.
Суд ҳукми билан “районо” ходими Маъмурий жавобгарлик тўғрисидаги кодекснинг 411-моддаси 1-қисмида назарда тутилган ҳуқуқбузарликни содир этганлиги учун айбли деб топилган ҳамда унга нисбатан 5 сутка маъмурий қамоқ жазоси тайинланган.
Мазкур низоли вазиятда ўзаро ҳақоратга йўл қўйгани сабабли ўқитувчи аёл ҳамда унинг укаси ҳам жавобгарликдан четда қолмади. Суд ҳукми билан уларнинг ҳар бирига МЖтКнинг 41-моддаси тартибида БҲМнинг бир баравари (412 минг сўм) миқдорида жарима жазоси берилди.
Аввалроқ пойтахтда собиқ турмуш ўртоғига шилқимлик қилган эркак уч суткага қамалгани хабар қилинганди. Тошкент вилоятида ўқувчисига шилқимлик қилган мактаб директори 5 суткага қамалганди.
Шаҳвоний шилқимлик қилганлик учун жазо
Маъмурий жавобгарлик тўғрисидаги кодекснинг 41-1-моддасига кўра, шаҳвоний шилқимлик қилиш, яъни шахсга нисбатан унинг учун номақбул бўлган ҳамда унинг шаъни ва қадр-қимматини таҳқирлайдиган, шахснинг ташқи қиёфасини ёки қадди-қоматини тавсифлашда, имо-ишора қилишда, тегинишда, чақиришда ифодаланган, шаҳвоний хусусиятга эга бўлган ҳаракатларни бир марта қўпол равишда ёки бир неча марта содир этганлик учун базавий ҳисоблаш миқдорининг икки бараваридан беш бараваригача миқдорда жарима солишга ёки беш суткагача муддатга маъмурий қамоққа олишга сабаб бўлади.
Худди шундай ҳуқуқбузарликлар маъмурий жазо чораси қўлланганидан кейин бир йил давомида такрор содир этилган бўлса, базавий ҳисоблаш миқдорининг беш бараваридан етти бараваригача миқдорда жарима солишга ёки ўн беш суткагача муддатга маъмурий қамоққа олишга сабаб бўлади.
