АҚШ президенти Дональд Трамп маъмурияти Кубага нефть етказиб беришни тўхтатиш мақсадида ҳарбий-денгиз блокадасини жорий этиш имкониятини ўрганиб чиқмоқда. Бу ҳақда Американинг Politico нашри ўз манбаларига таяниб хабар берди.
Таъкидланишича, якуний қарор ҳали қабул қилинмаган, маъмуриятда бундай чораларга қарши ва тарафдор бўлганлар бор. Хусусан, денгиз блокадасини давлат котиби Марко Рубио қўллаб-қувватламоқда.
Politicoнинг ёзишича, Венесуэладан нефть етказиб беришнинг тўхтатилиши аллақачон Куба иқтисодиётининг секинлашишига олиб келган. Нефть етказиб беришнинг тўлиқ блокадаси инсонпарварлик инқирозини келтириб чиқариши мумкинлиги сабабли, маъмуриятнинг айрим ходимлари бундай чораларга қарши чиқмоқда.
Қўшимча қилинишича, Трамп маъмурияти денгиз блокадасини Куба коммунистик ҳукуматини ағдаришнинг эҳтимолий усулларидан бири сифатида кўрмоқда.
Оқ уй бу маълумотни шарҳлашдан бош тортган. Reuters агентлиги хабар беришича, агар Кубага денгиз блокадаси режаси амалга оширилса, бу Трампнинг минтақавий давлатларни АҚШ позициясига мувофиқ ҳаракат қилишга мажбурлаш йўлидаги уринишларини янада кучайтиради. Бу қадам АҚШ президенти маъмуриятининг Ғарбий яримшарда ҳукмронликка эришиш мақсадлари нақадар жиддий эканлигини яна бир бор таъкидлайди.
