Кеча, 22 февраль куни Шимолий Корея етакчиси Ким Чен Ин Меҳнат партияси бош котиби лавозимига қайта сайланди. Бу ҳақда Шимолий Корея давлат ахборот агентлиги хабар берди.
Сайлов Пхеньянда бўлиб ўтган Корея Меҳнат партиясининг тўққизинчи съезди давомида ўтказилган. Қурултой ҳар беш йилда бир марта ташкил этилади. Унда Марказий қўмита аъзолари ҳам сайланади ва партия низомига айрим ўзгартиришлар киритилади.
Ким Чен Ин 2011 йилдан буён, отаси Ким Чен Ир вафотидан сўнг мамлакатни бошқариб келмоқда. 2019 йилда эса конституцияга киритилган ўзгартишлар орқали унинг давлат бошқарувидаги ваколатлари янада мустаҳкамланган.
Съездда Ким сўнгги беш йиллик фаолият якунларини сарҳисоб қилган ва келгуси беш йил учун устувор вазифаларни белгилаб берган. Унинг таъкидлашича, партия олдида иқтисодиётни ривожлантириш, аҳоли турмуш даражасини ошириш ҳамда давлат ва жамият ҳаётини ўзгартириш каби муҳим вазифалар турибди.
Шу билан бирга, Ким мамлакат сўнгги йилларда санкциялар ва глобал соғлиқни сақлаш инқирози каби қийинчиликларни бошдан кечирганига қарамай, бу синовларни енгиб ўтганини ва янги босқичга қадам қўяётганини билдирган.
