Непалда 23 февраль куни йўловчиларни олиб кетаётган автобус Тришули дарёсига қулаб тушди. Бу ҳақда NDTV хабар берди.
Ҳодиса Дҳадинг туманидаги Гажури шаҳри яқинида, тунги соат 1:30 атрофида содир бўлган. Қуролли полиция кучлари матбуот котиби Бишну Прасад Бҳаттага кўра, автобус Покҳарадан Катманду шаҳрига йўл олган. У пойтахтдан қарийб 90 километр ғарбда, Притҳви шоссеси бўйлаб ҳаракатланаётганда дарёга тушиб кетган.
Оқибатда камида 18 киши ҳалок бўлган, 26 нафар йўловчи жароҳатланган. Ҳалок бўлганларнинг жасадлари воқеа жойидан олиб чиқилган, жароҳатланганлар эса турли шифохоналарга ётқизилган. Қутқарув ишларига Непал армияси ва Қуролли полиция кучлари жалб этилган.
Ҳалок бўлганлар орасида Янги Зеландиядан бўлган бир эркак бор. Жароҳатланганлар орасида эса Япония ва Нидерландия фуқароси бўлган икки аёл борлиги маълум қилинди. Ҳодисанинг аниқ сабаби ҳозирча аниқланмаган. Бироқ полиция тезликни ошириш фалокатга сабаб бўлганини тахмин қилмоқда.
