Тошкент вилояти Бўстонлиқ туманида мушук болаларига нисбатан шафқатсиз муносабатда бўлган шахсларга қамоқ жазоси тайинланди. Бу ҳақда вилоят ИИББ ахборот хизмати хабар берди.
Маълум қилинишича, ижтимоий тармоқларда тарқалган видео ички ишлар органлари томонидан ўрганилганда, воқеа аслида 2025 йил декабрь ойида содир бўлгани аниқланган. Ҳолат юзасидан ўша вақтда ҳуқуқни муҳофаза қилувчи органларга ҳеч қандай мурожаат келиб тушмаган.
Суд қарорига кўра, видеода кўринган 33 ёшли шахсга нисбатан Маъмурий жавобгарлик тўғрисидаги кодекснинг 111-моддаси 2-қисми билан 15 сутка маъмурий қамоқ жазоси тайинланди. Шунингдек, ўзига бириктирилган қуролдан фойдаланиш қоидаларини бузган 30 ёшли шахс ҳам суд қарори билан 10 суткага қамалди.
ИИББ ҳайвонларга нисбатан шафқатсиз муносабат такрор содир этилса, жиноий жавобгарликка сабаб бўлишини эслатди. Шунингдек, жамиятда содир бўлаётган ҳолатларга бефарқ бўлмаётган фуқароларга миннатдорлик билдирилди.
