Шимолий Корея 20 сентябрь куни янги қуролни муваффақиятли синовдан ўтказиб, уни “ўта замонавий мудофаа технологияси” деб атади. Бу ҳақда NBC News хабар берди.
Мамлакат раиси Ким Чен Ин ва унинг қизи Жу Аэ қурол синовини шахсан кузатган. Ким синов мамлакат қуролли кучларининг жанговар салоҳиятини сезиларли даражада оширганини таъкидлаган.
“У бундай “янгилик” душманга бедаво бош оғриғи, жуда шафқатсиз ва муқаррар зарба беришини таъкидлади”, дея Кимнинг сўзларидан иқтибос келтирди KCNA.
Хабарда айнан қандай қурол синовдан ўтказилгани очиқланмаган. KCNA эълон қилган фотосуратларда Ким ўсмир қизи ҳамроҳлигида мамлакатнинг шарқий қирғоғи ва учиш траекторияси акс этган экранни кўздан кечираётгани тасвирланган. Экрандаги Hwasongpho-11-ма-1 ёзуви Пхеньян томонидан модернизация қилинаётган қисқа масофали баллистик ракеталар туркумининг бир қисмига ишора қилиши мумкин.
Сеулда жойлашган ва Шимолий Корея бўйича ихтисослашган NК News нашри маълумотларига кўра, синовдан ўтказилган ракета гипертовушли учиш қурилмаси билан жиҳозланган ракетанинг такомиллаштирилган вариантига ўхшайди.
Бундай қурилма жанговар каллакка мудофаа тизимларидан қочиш учун йўналишини ўзгартириш имконини беради. Шунингдек, бундай ракета қисман орбитага чиқарилиши ҳам мумкин. Гипертовушли ракеталар Ким Чен Ин мамлакатнинг ядровий салоҳиятини кучайтириш учун ишлаб чиқишни буюрган қуроллар қаторига киради.
