Украина АҚШ президенти Дональд Трампнинг Украина бўйича режасини қабул қилмаса, АҚШ уни разведка маълумотларидан маҳрум этишидан хавотирда. Бу ҳақда The Wall Street Journal газетаси хабар бермоқда.
“Президент Трамп Украинага ушбу таклифни қабул қилиш учун бир ҳафта муддат берди. Шундан сўнг Украина ва унинг иттифоқчилари муҳим ёрдам, жумладан, разведка маълумотлари ва қурол-яроғ етказиб берилишининг тўхтаб қолишидан хавотирда”, деб ёзади нашр.
Трамп ўзининг украиналик ҳамкасби Владимир Зеленский АҚШнинг Украинадаги можарони ҳал қилиш режасини маъқуллаши зарурлигини таъкидлаган.
20 ноябрь куни украиналик депутат Алексей Гончаренко Дональд Трампнинг тинчлик режасидаги 28 бандни эълон қилди.
Financial Times хабар беришича, Украина расмий шахслари ҳужжатни танқид қилиб, уни ўзгартиришларсиз қабул қилиб бўлмаслигини айтишмоқда. Бироқ Вашингтонда Украина раҳбари Владимир Зеленский уни 27 ноябргача имзолаши кутилмоқда. Режа НАТОдан воз кечиш, янги чегаралар ўрнатиш, буфер зона яратиш, Украина Қуролли Кучлари учун чекловлар киритиш ва Россиянинг музлатилган маблағларидан фойдаланишни назарда тутади.
