Жиззах вилоятининг Фориш туманидаги “ҳушёрхона”да юзага келган ҳолат юзасидан терговга қадар текширув ҳаракатлари олиб борилмоқда. Бу ҳақда вилоят ИИБ матбуот хизмати хабар берди.
Ижтимоий тармоқларда аёл киши жанжал қилгани, ИИБ ходими қизга куч ишлатиб, ерга ётқизиб, ушлагани акс этган видеолар тарқалиб, муҳокамаларга сабаб бўлганди. Расмий ахборотга кўра, 5 август куни соат 21:30 ларда Фориш тумани “Оқтепа” МФЙдаги ресторан ишчилари томонидан маст ҳолдаги бир гуруҳ шахслар буюртма қилинган таомлар тўловини қилмай, тартиббузарлик ва жанжал қилаётгани ҳақида ИИБга чақирув келиб тушган.
Воқеа жойига етиб борган профилактика инспекторлари ва Қўриқлаш бўлими ходимлари томонидан жамоат тартибини сақлаш вазифаси амалга оширилган. Бироқ тартиббузарлардан бири (муқаддам судланган аёл) ходимларнинг қонуний талабларига бўйсунмасдан, жанжални давом эттиргани сабабли белгиланган тартибда тиббий текширувдан ўтказилиб, мастлик ҳолатида бўлган шахсларни вақтинча сақлаш ва реабилитация қилиш пункти — “ҳушёрхона”га жойлаштирилган.
Тиббий кўрик давомида ушбу фуқаронинг танасида ҳеч қандай тан жароҳати аниқланмаган.
Кейинчалик, ушбу фуқаронинг қизи “ҳушёрхона”га келиб, жамоат тартибини бузган ҳолда ходимларга нисбатан турли ҳақоратли сўзлар ишлатиб, уларга тан жароҳати етказишга уринган.
“Ходимлар томонидан юзага келган вазият қонунчиликда белгиланган тартибда бартараф этилиб, фуқароларга нисбатан ҳеч қандай махсус воситалар (қўл кишани, резина таёқ, электрошокер) қўлланмаган”, дейилади хабарда.
Ҳозирда мазкур ҳолатда иштирок этган барчанинг хатти-ҳаракатларига ҳуқуқий баҳо бериш мақсадида терговга қадар текширув ҳаракатлари олиб борилмоқда.
“Ички ишлар органлари тўғрисида”ги қонуннинг 22-моддасига кўра, агар куч ишлатилмайдиган усуллар ички ишлар органи ходимининг зиммасига юклатилган мажбуриятларнинг бажарилишини таъминламаса, у қуйидаги ҳолларда жисмоний куч ишлатиш ҳуқуқига эга бўлади:
- жиноятларга ва маъмурий ҳуқуқбузарликларга чек қўйиш учун;
- жиноятлар ёки маъмурий ҳуқуқбузарликлар содир этган шахсларни энг яқиндаги ички ишлар органига ёхуд ҳуқуқни муҳофаза қилувчи бошқа органга олиб бориш ва бу шахсларни ушлаб туриш учун;
- ички ишлар органи ходимининг қонуний талабларига қаршилик кўрсатилишини бартараф этиш учун.
Ҳомиладорлик белгилари сезилиб турган аёлларга, ногиронлик белгилари кўриниб турган шахсларга, ёши аниқ кўриниб турган ёки маълум бўлган вояга етмаганларга нисбатан жисмоний куч ишлатиш тақиқланади.
