АҚШ яқин 24 соат ичида Эронга зарба йўллайди. Бу ҳақда кеча, 14 январь куни европалик расмийларга таяниб, “Reuters” агентлиги хабар берди.
Нашр маълумотига кўра, Эрон қўшни давлатларни огоҳлантириб, агар АҚШ томонидан ҳужум уюштирилса, улар ўз ҳудудида жойлашган Америка ҳарбий базаларига зарба беришини маълум қилган. Шундан сўнг Вашингтон Яқин Шарқдаги базаларидан ҳарбийларнинг бир қисмини олиб чиқиш ҳақида қарор қабул қилган.
Хусусан, Қатар ҳудудидаги АҚШнинг Ал-Удайд авиабазасидаги айрим ҳарбийларга 14 январь кечга қадар базани тарк этиш бўйича кўрсатма берилган. Агентлик суҳбатдошларидан бири бу жараён эвакуация эмас, балки шунчаки қайта жойлаштириш эканини таъкидлаган.
Ал-Удайд авиабазаси АҚШнинг Яқин Шарқдаги энг йирик ҳарбий базаси ҳисобланади. У ерда тахминан 10 минг нафар америкалик ҳарбий хизматчи жойлашган. 2025 йил 23 июнда Теҳрон АҚШнинг Исфаҳон, Фордо ва Натанздаги Эрон ядро объектларига ҳужумига жавобан ушбу базага зарба берган эди. Ўшанда Трамп 14 та ракетадан 13 таси уриб туширилгани, яна биттаси хавф туғдирмаганини айтган. Қатар эса авиабаза йўналишида етти ракета учирилганини, улардан бири база ҳудудига келиб тушганини билдирган.
13 январь куни Трамп эронлик намойишчиларга мурожаат қилиб, уларни давлат муассасаларини эгаллашга чақирган ҳамда “ёрдам аллақачон йўлда” эканини айтган. Журналистлар билан суҳбатда АҚШ Президенти бу сўзлари билан нимани назарда тутганини аниқлаштирмаган, бироқ америкалик фуқароларнинг Эрондан эвакуация қилиш масаласи кўриб чиқилиши кераклигини билдирган. “CBS News” телеканалига берган интервьюсида эса Трамп Теҳронга нисбатан ўзининг якуний мақсади ғалаба эканини айтган, лекин бу тушунчани изоҳлаб бермаган.
Нашрнинг исроиллик расмийга таяниб хабар беришича, 12 январь куни Исроил Бош вазири Биньямин Нетаньяхунинг хавфсизлик кабинети “Эрон режимининг қулаши ёки АҚШ аралашуви эҳтимоли” ҳақида хабардор қилинган.
Эронда оммавий норозилик намойишлари 2025 йил декабрь ойининг охиридан бери давом этмоқда. Намойишлар мамлакатдаги чуқур иқтисодий инқироз фонида бошланган. Йил охирига келиб инфляция даражаси 42,2 фоизга етган, миллий валюта – эрон риали эса рекорд даражада қадрсизланиб, 1 доллар учун 1,42 миллион риалгача тушиб кетган.
Намойишчилар ҳукумат ва Ислом Республикаси Олий раҳбари Оятуллоҳ Али Хоманаийнинг истеъфосини талаб қилмоқда. Норозилик акциялари ўнлаб шаҳарларни қамраб олган. Бутун мамлакат бўйлаб интернет ўчирилгани сабабли қурбонлар ҳақидаги маълумотларни тўплаш ва тасдиқлаш қийинлашмоқда. Ҳалок бўлганлар намойишчилар орасида, хавфсизлик кучлари сафида ҳам борлиги айтилмоқда.
