Ўзбекистон 2026-йилги Глобал инновация индекси (ГИИ) рейтингида 139 та давлат орасида 77-ўринни эгаллади. Бу 2025-йилдаги кўрсаткичга нисбатан 2 поғона юқори. Рейтинг 29-сентябр куни эълон қилинди.
Глобал инновация индекси Бутунжаҳон интеллектуал мулк ташкилоти (WIPO) томонидан Портуланс институти, корпоратив ва академик тармоқлар ҳамда ГИИ маслаҳат кенгаши билан ҳамкорликда тайёрланади. Ҳисобот 80 га яқин индикаторни ўз ичига олади.
Ўзбекистон қуйи ва ўрта даромадли 36 та давлат орасида кучли саккизликка, Марказий ва Жанубий Осиёнинг 11 давлати орасида эса кучли тўртликка кирди.
Мамлакат инновацияларга йўналтирилган сармоя ва ресурслар бўйича 68-ўринни эгаллади. Ушбу кўрсаткичда Ўзбекистон бир поғона юқорилаган. Инновациялар натижадорлиги бўйича эса мамлакат 78-ўринни қайд этиб, бир йил ичида 14 поғона ўсишга эришган.
Рейтингнинг айрим кўрсаткичларида Ўзбекистон юқори натижаларни қайд этди. Жумладан, илм-фан ва муҳандислик соҳасида битирувчилар бўйича 2-ўрин, тадбиркорлик сиёсати ва маданияти бўйича 3-ўрин, стартап ва скейлапларни молиялаштириш бўйича 4-ўрин ҳамда меҳнат унумдорлиги ўсиши бўйича 7-ўрин эгалланди.
Ўзбекистон ГИИ рейтингига илк бор 2015-йилда киритилган ва ўшанда 141 та давлат орасида 122-ўринни эгаллаган. 2025-йилда эса мамлакат 139 та давлат орасида 79-ўринда қайд этилган.
