Украина президенти Володимир Зеленский АҚШ воситачилик қилаётган тинчлик жараёнлари бўйича дипломатик саъй-ҳаракатлар фаоллашган бир вақтда Германияга ташриф буюрди. У Берлинда нафақат Европа етакчилари, балки АҚШ мулозимлари билан ҳам учрашувлар ўтказади.
Аввалроқ, АҚШ 28 банддан иборат тинчлик режасини илгари сурган, бироқ бу ҳужжат кўплаб кузатувчилар томонидан Украинани таслим бўлишга ундовчи ташаббус сифатида баҳоланганди. Кейинчалик Украина ва Европа вакиллари билан маслаҳатлашувлардан сўнг Вашингтон режа бандларини 20 тагача қисқартирган.
Шундан сўнг Оқ уй Киевга босимни ошириб, ўзи томонидан таклиф этилган келишувга рози бўлишга чақирди. Президент Дональд Трамп эса Зеленскийни ушбу режани қабул қилишдан бош тортишда айблади. Украина президентининг Берлинга ташрифи ҳам мана шу жараёнларнинг бир қисми ҳисобланади. У Европа етакчилари ва Трампнинг махсус вакиллари билан “урушни тугатишга қаратилган сиёсий келишув” масаласини муҳокама қилади.
Associated Press хабарига кўра, Қўшма Штатларнинг махсус вакили Стив Уиткофф ва Трампнинг куёви, шу билан бирга, маслаҳатчиси Жаред Кушнер музокаралар учун Берлинга етиб келган. The Wall Street Journal нашрининг ёзишича, 14–15 декабрь кунлари улар Украина раҳбари билан мулоқот ўтказади. Учрашувларда Франция президенти Эммануэл Макрон, Буюк Британия бош вазири Кир Стармер ва Германия канцлери Фридрих Мерс ҳам иштирок этади.
Берлинда журналистлар билан суҳбатлашган Зеленский Киев ҳали Қўшма Штатлардан янгиланган таклифларга расмий жавоб олмаганини, бироқ мулоқотга тайёр эканини айтди. У, шунингдек, “ҳаммага ёқадиган режа бўлмаслиги”ни қўшимча қилди. Украиналиклар етакчисининг таъкидлашича, тинчлик режаси адолатли бўлиши ва Москвага янги уруш бошлаши учун имкон қолдирмаслиги керак.
