Германия ҳукумати Эрон режимининг минтақадаги давлатларга ҳужумлари тўхтамаса, Исроил ва АҚШнинг ислом республикасига қарши ҳарбий кампаниясига қўшилиш масаласини жиддий кўриб чиқмоқда. Бу ҳақда Германия сиёсий ва ҳарбий доираларидаги манбаларга таяниб Исроилнинг Army Radio станцияси хабар берди.
Исроил радиосининг Германия Ташқи ишлар вазирлиги расмийлари ҳамда Бундестагнинг Ташқи ишлар қўмитаси аъзоларидан олган маълумотига кўра, АҚШ билан биргаликдаги эҳтимолий ҳарбий ҳаракатлар режаси аллақачон ишлаб чиқилмоқда.
Кутилаётган кўмак йўналишларига қуйидагилар киради: тўғридан-тўғри ҳаво зарбаларида иштирок этиш ҳамда ҳарбий ва авиация техникаси бўйича кўмак бериш, дейилади яҳудий нашрида.
Берлиннинг расмий позицияси
Гарчи ҳарбий доираларда режалар муҳокама қилинаётган бўлса-да, Германия ташқи ишлар вазири Йоханн Вадепул мамлакатнинг ушбу можарода иштирок этиш нияти йўқлигини таъкидлади.
Шу билан бирга, Германия канцлери Фридрих Мерс АҚШ президенти Дональд Трамп билан музокаралар ўтказишга тайёргарлик кўраётгани маълум қилинди.
Европа учлигининг огоҳлантириши
Кеча тунда, 1 март куни Франция, Германия ва Буюк Британия Эроннинг минтақадаги ҳужумларини кескин қоралаб, қўшма баёнот билан чиқди.
“Зарурат туғилганда, Форс кўрфазидаги манфаатларимиз ва иттифоқчиларимизни ҳимоя қилиш учун Эронга қарши мудофаа чораларини кўришга тайёрмиз”, дейилади уч давлат баёнотида.
