Экстремистик йўналишдаги жиноятни содир этгани учун халқаро қидирувда бўлган Ўзбекистон фуқароси Польшадан экстрадиция қилинди. Бу ҳақда Интерполнинг Ўзбекистондаги Миллий марказий бюроси хабар берди.
Маълум қилинишича, у Ўзбекистон Жиноят кодексининг 244-2-моддаси (диний экстремистик, сепаратистик, фундаменталистик ёки бошқа тақиқланган ташкилотлар тузиш, уларга раҳбарлик қилиш, уларда иштирок этиш) биринчи қисмида назарда тутилган жиноятни содир этганликда айбланган.
Жиноят иши қўзғатилгач, айбланувчи Ўзбекистон ҳудудини тарк этиб, узоқ вақт давомида хорижда яшириниб юрган, шу сабабли Интерпол каналлари орқали халқаро қидирувга берилган.
Интерполнинг Тошкент ва Варшава шаҳарларидаги Миллий марказий бюролари ўртасидаги ҳамкорлик натижасида ҳамда Ўзбекистоннинг Польшадаги элчихонаси вакилининг бевосита иштирокида қидирувдаги шахснинг турган жойи аниқланди.
У Интерполнинг Ўзбекистондаги Миллий марказий бюроси ходимларига топширилди ва Варшавадан Тошкентга экстрадиция қилинди.
