Тошкент шаҳри Учтепа туманининг Қўрғонтепа маҳалласида сунъий кўл ва дам олиш ҳудудини барпо этиш ишлари бошланди. Бу ҳақда пойтахт ҳокимлиги ахборот хизмати хабар берди.
Маълум қилинишича, лойиҳа 340- ва 346-сонли мактабгача таълим ташкилотлари оралиғидаги 90 сотих бўш майдонда амалга оширилмоқда. Бу ерда 0,37 гектарлик, чуқурлиги 2 метр бўлган сунъий сув ҳавзаси ташкил этилади.
Кўл дренаж қудуқлари ҳамда ариқлардан келадиган сув оқими ҳисобига тўлдирилиши кўзда тутилган. Сув ҳавзасида чўмилишга рухсат берилмайди.
Лойиҳа доирасида кўл атрофида сайр йўлаклари қурилиб, ўриндиқлар ўрнатилади. Ҳудудда ҳозирда ўсаётган 66 туп манзарали дарахтнинг барчаси сақлаб қолиниши, қўшимча равишда янги дарахтлар экилиши режалаштирилган.
Ҳокимликка кўра, сунъий кўл ҳудуддаги чанг миқдорини камайтириш, микроиқлимни яхшилаш ва аҳоли учун дам олиш шароитларини яратишга хизмат қилиши кутилмоқда. Қурилиш ишларини 2026 йил охиригача якунлаш мўлжалланган.
Аввалроқ Тошкентнинг Сергели туманидаги Қумариқ маҳалласида 1,7 гектар майдонда фавворали сунъий кўл қурилиши бошлангани хабар қилинганди. Унинг атрофидаги 5 гектар ҳудудда сайр ва велосипед йўлаклари, болалар майдончалари ҳамда дам олиш жойлари ташкил этилиши режалаштирилган.
Мазкур лойиҳалар пойтахтнинг барча туманларида жами 12 та сунъий сув ҳавзасини барпо этиш ташаббуси доирасида амалга оширилмоқда.
