Италиянинг Ўзбекистондаги янги тайинланган элчиси Гвидо Де Санктис ташқи ишлар вазири Бахтиёр Саидовга ишонч ёрлиқлари нусхаларини топширди.
Вазирнинг ёзишича, қабул маросими доирасида бўлиб ўтган учрашувда Ўзбекистон ва Италия ўртасидаги икки томонлама ҳамкорликнинг бугунги ҳолати ва истиқболлари муҳокама қилинди.
Томонлар савдо, сармоя ва иқтисодий алоқаларни кенгайтириш, амалий ҳамкорликни ривожлантириш ҳамда ишбилармон доиралар ўртасидаги алоқаларни рағбатлантириш муҳимлигини таъкидлади. Учрашув якунида элчига мамлакатдаги фаолияти давомида муваффақиятлар тиланди.
“Тошкентдаги миссиямни, шунингдек, Тожикистонда аккредитациядан ўтган ҳолда фаолиятимни бошлаш мен учун катта шарафдир. Сиёсий мулоқотни, иқтисодий, илмий ва маданий ҳамкорликни, институтлар ўртасидаги алмашинувларни ҳамда бизнес ва фуқаролар учун имкониятларни мустаҳкамлаш йўлида ишлайман. Буларнинг барчаси Марказий Осиёда ‘Италия +5’ ташаббуси доирасида амалга оширилади”, деб таъкидлади янги элчи.
Сиёсатчи Пергабриеле Пападиа де Боттини 2024 йил декабрда Италиянинг Ўзбекистондаги элчиси этиб тайинланган. У ўз фаолияти давомида ўзбекистонлик муҳожирларнинг Италиядаги фаолиятига катта эътибор қаратган. “Миграция — муҳим йўналиш, Ўзбекистон бой тажрибаси билан МОдаги ҳамкорлар учун намуна бўла олади”, деган де Боттини.
