Немис мулозимлари Гренландия хавфсизлигини таъминлаш учун НАТО доирасида алоҳида ҳарбий миссия ташкил этишни таклиф қилмоқчи. Бу ҳақда Bloomberg ўз манбаларига таяниб хабар берди. Агентликка кўра, расмий жиҳатдан миссия альянснинг Арктика минтақасидаги манфаатларини ҳимоя қилади. Бироқ амалда унинг асосий вазифаси Гренландияни муҳофаза қилиш бўлади.
Мазкур ташаббус АҚШ президенти Дональд Трамп Гренландия бўйича риторикасини кескинлаштирган бир вақтда илгари сурилди. Хабарларга кўра, Венесуэла президенти Николас Мадурони оғирлаш бўйича операция муваффақиятидан сўнг Трамп яна Гренландия мавзусига қайтган. Орол Данияга тегишли бўлса-да, Оқ уй ҳудуд АҚШ миллий хавфсизлиги учун зарурлигини айтиб келади.
Трампнинг Гренландияга нисбатан даъволари Европа етакчиларида жиддий норозилик уйғотди. Германия вице-канцлери Ларс Клингбайл Қўшма Штатларга мурожаат қилиб, Оқ уйни Дания ва Гренландия суверенитетини ҳурмат қилишга, шунингдек, халқаро ҳуқуқ нормаларига риоя этишга чақирди.
“Гренландиянинг келажаги фақат Дания ва Гренландиянинг ўзига боғлиқ. Ҳудудий яхлитлик ва суверенитет ҳамма учун, хусусан, АҚШ учун ҳам мажбурийдир”, деган у.
Германия ташқи ишлар вазири Ёҳанн Вадефул яқин кунларда Вашингтонга ташриф буюриши хабар қилинган. Маълумотларга кўра, у АҚШ давлат котиби Марко Рубио билан учрашиб, Гренландия масаласини муҳокама қилади. Вазирнинг сўзларига кўра, Берлин келишмовчиликларни босим эмас, мулоқот орқали ҳал қилиш тарафдори.
Германия Дания суверенитетини қўллаб-қувватлаб чиқаётган ягона давлат эмас. Унинг Европа Иттифоқидаги шериклари, шунингдек, Буюк Британия ҳам оролга ҳарбий куч жойлаштириш имкониятини муҳокама қилмоқда. Бундан мақсад Арктика савдо йўллари хавфсизлигини таъминлаш ва АҚШ томонидан билдирилаётган хавотирли баёнотларни юмшатишдир.
