Кремль учун урушни тугатиш бўйича асосан мақбул бўлган ягона вариант – АҚШнинг дастлабки тинчлик режаси. Европанинг таклифлари самарасиз ва Кремль манфаатларига мос келмайди. Бу ҳақда Россия Президентининг ёрдамчиси Юрий Ушаков кеча, 24 ноябрь куни журналистларга берган интервьюсида сўз очди.
У Европа таклифлари деганда, АҚШ ва Украина делегациялари Женевада муҳокама қилган ўша ҳужжат назарда тутилганми ёки йўқ аниқ айтмаган. Ҳозирча тинчлик режасининг ҳеч бир варианти расмий равишда эълон қилинмаган. Турли бандлар фақат бир нечта ОАВ томонидан тарқатилган.
Ушаковнинг сўзларига кўра, Украина бўйича тинчлик режаси атрофида кўп миш-мишлар бор ва Россия фақат АҚШдан бевосита олинган маълумотларга ишонади. Унинг айтишича, Москва АҚШнинг бир версияси билан таниш, аммо бу борада аниқ музокаралар бўлмаган. У Аляскада муҳокама қилинган АҚШ таклифларининг кўп бандлари Россия учун мақбул эканини қўшимча қилган. Ушаков АҚШ яқин вақт ичида Москва билан режани юзма-юз муҳокама қилишга чиқишини кутаётганини айтди, лекин аниқ келишувлар ҳали йўқ. Украина ва Европа музокара томонлари сифатида тилга олинмаган.
Оқ уй матбуот котиби Кэролайн Ливиттнинг айтишича, янгиланган режа яна Россияга тақдим этилиши керак. Шунингдек, у АҚШ Президенти Дональд Трамп ва Украина Президенти Владимир Зеленскийнинг жорий ҳафтада учрашуви режалаштирилмаганини билдирган. Трамп аввалроқ тинчлик битимини имзолаш учун 27 ноябрни охирги муддат сифатида кўрсатган эди.
24 ноябрь тонгида Украина ва АҚШ расмийлари Женевадаги “самарали музокаралар” натижасида янгиланган “тинчликка эришиш бўйича асосий ҳужжат” ишлаб чиқилганини маълум қилди. Қўшма баёнотда музокаралар самарали бўлгани таъкидланган.
АҚШ Давлат котиби Марко Рубио Дональд Трамп маъмуриятининг қайта ишланган тинчлик режаси амалга ошиш имконияти юқори эканини айтганди. У Женевада Украина делегацияси ва Европа иттифоқчилари билан маслаҳатлашувлардан сўнг, яратилган ҳужжат энди келгуси ишлар учун асос бўлиб хизмат қилишини билдирган.
Трамп 24 ноябрь куни ўзининг Truth Social платформасида Россия ва Украина ўртасидаги “тинчлик музокараларида ижобий силжиш бўлиши мумкин” деб ёзди.
ОАВ маълумотига кўра, Европа давлатлари АҚШнинг Украина бўйича тинчлик режасига киритмоқчи бўлган ўзгаришлар бир қанча асосий бандларни Киев фойдасига сезиларли даражада юмшатади.
“Financial Times” ва “The Washington Post” нашрларининг ёзишича, Трамп маъмурияти таклиф қилган дастлабки 28 бандлик режа 19 бандга қисқартирилган. Ўзгаришлар Женевадаги музокаралардан кейин киритилган.
Нашрлар қайси бандлар олиб ташланганини аниқ айтмаган. “The Washington Post” манбаларига кўра, бандларнинг аниқ сони ҳали келишилмаган. Бироқ режанинг асоси ҳануз АҚШнинг дастлабки таклифи бўлиб қолмоқда.
