Афғонистонда портламай қолган ўқ-дорилар 2025 йилда жами 471 нафар тинч аҳолининг ҳалок бўлишига олиб келди. Бу ҳақда кеча, 2 апрель куни Бирлашган Миллатлар Ташкилоти Инсон ҳуқуқлари кенгашининг Афғонистон бўйича махсус маърузачиси Ричард Беннет маълум қилди.
Беннет айниқса, болалар орасидаги қурбонлар сони юқорилигидан жиддий хавотир билдирган. У портлашлар оқибатида жабрланганларнинг 67 фоизи болалар эканини таъкидлаган. Шунингдек, Беннет мина билан боғлиқ ҳодисаларнинг 24 фоизи болалар уларни ўйинчоқ деб ўйлаб ўйнаган пайтда содир бўлишини айтган.
У халқаро ҳамжамиятни миналардан тозалаш ишларига сармоя киритишга ҳамда Афғонистон фуқароларининг ҳаётини ҳимоя қилишга чақирган.
“Мен халқаро ҳамжамиятни Афғонистондаги миналардан тозалаш дастурларини молиялаштиришни ошириш ва давом эттиришга чақираман. Ҳеч бир бола минани ўйинчоқ деб адаштирмаслиги учун барчамиз масъулмиз”, деган Беннет.
Ҳисоботда қайд этилишича, Афғонистондаги мина мавжуд ҳудудлар инсоннинг яшаш ҳуқуқи, соғлиқ ҳуқуқи ва хавфсиз муҳитда яшаш ҳуқуқини доимий равишда бузмоқда.
Маълумотларга кўра, 2025 йилда миналардан тозалаш гуруҳлари катта ҳудудларни тозалаган, бироқ бу борадаги ютуқлар ҳали ҳам мустаҳкам эмас.
