Аввалроқ, Тошкент шаҳрида маст ҳолда машина бошқарган эркак пост-патруль хизмати ходимига мушт туширгани ва жараёнга унинг акаси экани айтилган подполковник аралашгани хабар қилинган эди. Бугун, 3 апрель куни укасининг ҳаракатлари ортидан ички ишлар органлари тизимида ишловчи подполковник Шерзод Пардаев ишдан олинди. Бу ҳақда Ички ишлар вазирлиги хабар берди.
Қайд этилишича, ИИВ тизимида қонунийлик ва хизмат интизомини таъминлаш масалаларига бағишланган навбатдаги йиғилиш вазир ўринбосари полковник Диёрбек Саттаров раҳбарлигида Сирдарё вилояти Ички ишлар бошқармасида ўтказилиб, унда соҳада тўпланиб қолган камчилик ва муаммолар танқидий-ҳуқуқий жиҳатдан таҳлил этилган.
Хусусан, кеча, 2 апрель куни ижтимоий тармоқларда тарқалган ҳамда жамоатчиликнинг ҳақли эътирозига сабаб бўлган ҳолат – Сирдарё вилояти ИИБ раҳбар ходими ва унинг яқин қариндоши иштирокидаги ҳуқуқбузарлик кескин муҳокама қилинган. Ушбу ҳолат хизмат ваколатларини суиистеъмол қилиш ва мансаб мавқеидан шахсий манфаатлар йўлида фойдаланиш эҳтимолини кўрсатувчи салбий ҳолат сифатида ҳуқуқий баҳоланган.
Ҳуқуқбузарликка йўл қўйган подполковник Шерзод Пардаев вазирликнинг тегишли буйруғи билан лавозимидан озод этилган.
“Унинг мисолида хизмат интизомини бузган шахсларга нисбатан жавобгарлик муқаррарлиги принципи амалда таъминланиши шартлиги алоҳида таъкидланди. Шунингдек, мансаб ва лавозимдан қатъи назар, хизмат интизомини бузган ҳар қандай ходимга нисбатан муросасиз чоралар кўрилиши давом эттирилиши қайд этилди”, дейилади хабарда.
