Ижтимоий тармоқларда Тошкент вилояти Бекобод туман Ички ишлар бўлими Жиноят қидируви бўлими тезкор ходими 43 ёшли эркакни машинасида уриб кетиши оқибатда эркак вафот этгани, шунингдек, ИИО ходими марҳумнинг мурдасини дарёга оқизиб юборгани ҳақида хабарлар тарқалди.Бош прокуратура матбуот котиби Ҳаёт Шамсутдинов ҳолатга ойдинлик киритди.
Унинг билдиришича, ҳақиқатдан ҳам жорий йилнинг 11 декабрь куни Бекобод тумани “Қорақуйли” МФЙ ҳудудидан ўтган “Қорасув-Бўка-Бекобод” автомобиль йўлининг 64-километрида оқ рангли Nexia-3 русумли автомашина пиёдани уриб юбориб, йўл-транспорт ҳодисаси содир этган. Ушбу автоҳалокат оқибатида 43 ёшли эркак Б.У. вафот этган.
Мазкур ҳолат юзасидан жорий йилнинг 12 декабрь куни Бекобод тумани прокуратураси томонидан Жиноят кодексининг 266-моддаси (транспорт воситалари ҳаракати ёки улардан фойдаланиш хавфсизлиги қоидаларини бузиш) 2-қисми ва 117-моддаси (хавф остида қолдириш) 2-қисми билан жиноят иши қўзғатилиб, гумонланувчи шахсга “қамоққа олиш” тарзидаги эҳтиёт чораси қўлланилган. Ҳозирда, марҳум Б.У. нинг мурдасини топишга қаратилган тезкор қидирув тадбирлари давом эттирилмоқда.
