FIFA президенти Жанни Инфантино АҚШ президенти Дональд Трампни қўллаб-қувватлагани учун ташкилот низомидаги сиёсий бетарафлик тамойилини бузганликда айбланмоқда. Бу ҳақда The Athletic нашрига FIFA бошқарув қўмитасининг собиқ раиси Мигел Мадуру маълум қилган.
Мадурунинг сўзларига кўра, Инфантино сиёсий баҳсларда муайян позицияни эгалламаслиги керак эди:
“FIFA президенти сифатида у сайлов натижаларини ҳурмат қилиш зарурлигини айтиши мумкин, аммо Инфантино бундан ҳам нарига ўтди. У нафақат Трампни президент сифатида эътироф этди, балки унинг сиёсатини қўллаб-қувватлади ва бошқаларни ҳам шунга чақирди”, деди Мадуру.
Унинг фикрича, Инфантино демократик жамиятда бошқалар Трамп сиёсатига қарши чиқиш ҳуқуқига эга эканини ҳам тушуниши лозим эди:
“FIFA раҳбари сифатида сиёсий нейтралликни сақлаш учун сиёсий баҳсларда қатъий бир позицияни эгалламаслик керак. Айниқса, барча Трамп сиёсатини қўллаб-қувватлаши керак деб айтиш — бу аллақачон этик меъёрларнинг бузилиши.”
Мадурунинг таъкидлашича, Инфантино баёнотлари ортидан FIFA ахлоқ кодексининг 15-моддасини бузган.
Маълумот учун, Маямида бўлиб ўтган Америка бизнес форуми доирасида сўзга чиққан FIFA президенти Жанни Инфантино АҚШ президенти Дональд Трампни мақтади ва “биз ҳаммамиз унинг қилаётган ишларини қўллаб-қувватлашимиз керак, чунки менимча, ҳаммаси яхши кетаяпти”, деди. Мазкур ҳолат ортидан кўпчилик Инфантинога эътироз билдирган.
