Эронда АҚШ ва Исроил зарбалари ортидан ички вазият янада кескинлашди. Мамлакат хавфсизлик идоралари намойишчилар ва жиноят гумондорларига қарши ўқотар қурол қўллашга рухсат берилганини билдирган. Бу ҳақда “Euronews” хабар берди.
Эрон полицияси раҳбари Аҳмад Ризо Радан давлат телевидениесига берган интервьюсида уруш шароити сабаб гумон қилинган ўғриларга нисбатан “кўрган заҳоти отиш” буйруғи берилганини айтган. Унинг сўзларига кўра, қўлга тушган шахслар қурол орқали ҳаракатдан тўхтатилади.
Бундан ташқари, парламентнинг миллий хавфсизлик комиссияси аъзоси Салар Велaятмадaр ҳам намойишларга чиққан ёшлар ҳақида кескин огоҳлантириш берган. Давлат телеканали орқали эфирга узатилган интервьюда у ота-оналарни фарзандларини намойишлардан тийишга чақириб, акс ҳолда оғир оқибатлар бўлиши мумкинлигини иддао қилган.
Сўнгги ҳафталарда мамлакатда бир қатор полиция бўлимлари ва “Басиж” ҳарбийлашган гуруҳи объектларига ҳужумлар қайд этилган. Ҳукумат эса бу ҳолат янги кўча намойишларига туртки бериши мумкинлигидан хавотирда.
Жорий йил декабрь охиридан бери Эронда талабалар иштирокида кенг кўламли норозилик намойишлари кузатилмоқда. Ҳукумат интернетни чеклаб, намойишларда иштирок этганларга нисбатан қаттиқ жазо чораларини қўллашини урғулаган.
Теҳрон расмий ҳисоботларда минглаб қурбонлар борлигини тан олган. Бироқ инсон ҳуқуқлари ташкилотлари ва мустақил манбалар ҳалок бўлганлар сони анча юқори бўлиши мумкинлигини айтмоқда.
