Эрон Туркия томон учинчи бор баллистик ракета учирди, НАТОнинг ҳаво ҳужумидан мудофаа тизими уни уриб туширди. Бу ҳақда Туркия Мудофаа вазирлиги хабар берди.
Вазирлик маълумотига кўра, ракета НАТОнинг Шарқий Ўрта ер денгизида жойлаштирилган ҳаво ва ракетага қарши мудофаа тизимлари томонидан зарарсизлантирилган.
“Мамлакатимиз ҳудуди ва ҳаво кенгликларига йўналтирилган ҳар қандай таҳдидга қарши барча зарур чоралар қатъият билан ва иккиланмасдан кўрилмоқда. Ҳодисанинг барча жиҳатларига ойдинлик киритиш учун тегишли мамлакат билан маслаҳатлашувлар олиб борилмоқда Минтақадаги барча ўзгаришлар миллий хавфсизлик устуворлиги асосида диққат билан кузатилиб, таҳлил қилинмоқда”, дейилади вазирлик баёнотида.
Эрон илк бор 4 март куни Туркия томон ракета учирган эди. Ўшанда у Ироқ ва Сурия ҳаво ҳудуди орқали мамлакатга кирган. НАТО мазкур ҳужумда ҳам ракетани уриб туширишга муваффақ бўлган.
9 март куни эса Эрон Туркия томон иккинчи баллистик ракетани учирди. У мамлакат ҳаво ҳудудига кирган пайтда уриб туширилди. Ракета парчалари Газиантеп шаҳри яқинига тушди, қурбонлар қайд этилмади.
Туркия “яхши қўшничилик” муносабатлари ва минтақадаги барқарорликка катта аҳамият беришини таъкидлади. Шунингдек, мамлакатга қаратилган ҳар қандай таҳдидга чоралар кўрилишидан огоҳлантирди.
