Италия жанубидаги автоёнилғи қуйиш шохобчасида (АЁҚШ) машинага ўт қўйилиши оқибатида тўрт нафар мигрант ҳалок бўлди. Ушбу жиноят иши бўйича икки киши қўлга олинган. Бу ҳақда тергов органлари маълумотига таяниб, “The Guardian” хабар берди.
Қайд этилишича, фожиа Италиянинг Калабрия минтақасида юз берган. У ердаги АЁҚШ ҳудудида автомобилнинг ёқиб юборилиши оқибатида тўрт нафар мигрант ишчи ҳаётдан кўз юмган. Ҳалок бўлганларнинг уч нафари Афғонистон, бир нафари эса Покистон фуқароси бўлган. Тергов маълумотларига кўра, автомобиль Козенца шаҳри яқинидаги Амендолара коммунасида жойлашган ёнилғи қуйиш шохобчасида ёниб кетган.
Прокурор Алессандро Д’Алессионинг маълум қилишича, ушбу жиноятни содир этишда гумон қилиниб икки нафар Покистон фуқароси ҳибсга олинган. Уларга нисбатан оғирлаштирувчи ҳолатларда қотиллик содир этиш айблови қўйилган.
Ҳужум кузатув камераларига муҳрланиб қолган. Италия ОАВларининг хабар беришича, гумонланувчилар машина ёнилғи қуйиш устуни яқинида турган вақтда унга тез ёнувчи суюқлик сепиб, ўт қўйиб юборишган. Яна бир Афғонистон фуқароси автомобилнинг юкхонаси (багаж) орқали ташқарига чиқишга улгурган. У қўлларидан куйиш жароҳати олган, бироқ тирик қолган.
Ҳозирда тергов ҳаракатлари давом этмоқда. Ҳуқуқ-тартибот идоралари воқеанинг барча тафсилотларини аниқлаштирмоқда.
