Тожикистоннинг Суғд вилоятидаги Айний туманида жойлашган кўмир конида содир бўлган портлаш оқибатида олти нафар афғонистонлик ишчи ҳалок бўлди. Портлаш вақтида ишчиларнинг барчаси кон ичкарисида бўлган. Бу ҳақда “Tasnim News” хабар берди.
Нашрнинг ёзишича, ҳозирда ҳалок бўлганларнинг жасадларини вайроналар остидан чиқариш ишлари олиб борилмоқда. Уларнинг исмлари эълон қилинмаган, бироқ маълум қилинишича, уларнинг беш нафари Афғонистоннинг Дайкунди вилоятидан, бири эса Ғур вилоятининг Лали Сари Жангал туманидан бўлган.
“Af.shafaqna.com”нинг аниқлик киритишича, ҳодиса жорий йилнинг 3 ноябрь куни содир бўлган. Тожикистон расмийлари ҳозирча бу фожиа юзасидан изоҳ бермаган.
“Tasnim News” маълумотига кўра, Тожикистондаги кўмир конларида юзлаб Афғонистон фуқаролари меҳнат қилади. Жорий йилнинг май ойида Суғд вилоятидаги бошқа бир конда ҳам шунга ўхшаш ҳодиса рўй берган, оқибатда саккиз нафар афғон ишчиси ҳалок бўлган. “Etilaatroz” нашри ўша пайтда ҳалок бўлганларнинг суратлари ва исмларини эълон қилган, уларнинг барчаси Дайкунди вилояти аҳолиси экани маълум қилинган. Нашр манбасига кўра, портлаш 9 май куни туш пайтида Айний туманидаги конлардан бирида содир бўлган бўлиб, сабаб сифатида кон ичида газ тўпланиши кўрсатилган.
Хабарда айтилишича, ҳалок бўлганларнинг жасадлари 10 май куни эрталаб Афғонистонга олиб кетилган. Ўша пайтда ҳам Тожикистон расмий идоралари бу воқеани тасдиқламаган ва изоҳ бермаган.
