Россиялик депутат никоҳни бекор қилганлик учун 40 минг рубль миқдорида (тахминан 493 доллар) жарима жорий этишни таклиф қилди. Ташаббус “Единая Россия” партиясидан Брянск вилояти думаси депутати Михаил Ивановга тегишли.
Депутат никоҳдан ўтаётган фуқароларга 20 минг рублдан беришни ҳам таклиф қилган ва чекланган бюджет шароитида ажрашиш учун жарима “мувозанатлаштирувчи омил” бўлиши мумкинлигини айтган.
“Ҳар қандай депутат ташаббуси бюджет имкониятлари билан чекланади. Шунинг учун ҳеч бўлмаганда ажрим учун 40 минг рубль жарима жорий қилиш керак”, деган Михаил Иванов.
Бундан ташқари, у Россия қонунчилигида “оналик ва болаликни обрўсизлантиришни” тақиқланиши кераклигини айтиб, “ҳаддан ташқари эркинликка чек қўйиш керак”лигини таъкидлади. Оилавий сиёсат мавзуси федерал парламентда ҳам фаол муҳокама қилинмоқда.
Август ойида Давлат думасига амалда ажрашган ота-оналарга болани биргаликда тарбиялашда иштирок этиш мажбуриятини юклайдиган қонун лойиҳаси киритилди. Ҳужжатда Оила кодексини ота-оналар келиша олмаган ҳолларда судга “биргаликда тарбиялаш тартиби”ни мустақил белгилаш имконини берувчи норма билан тўлдириш таклиф этилди.
- Россияда ажримлар сони ошмоқда
Статистик маълумотларга кўра, Россия 2024 йили ажримлар сони бўйича дунёда учинчи ўринни эгаллаган: ўнта никоҳга саккизга яқин ажрим тўғри келган. “Росстат” эса 2020 йилда Россияда 564 704 та, 2021 йилда 644 209 та, 2022 йилда 682 850 та, 2023 йилда эса 683 796 та ажримни қайд этган. 2024 йилда ажралишлар сони 6 фоизга — 644 мингтагача камайган, бироқ бир вақтнинг ўзида тузилган никоҳлар сони ҳам камайиб, 7 фоизга қисқарган.
2025 йилдан бошлаб, Россияда ажрашиш учун бож 650 рублдан 5000 рублгача оширилди. Расмийлар деярли саккиз баравар кўтарилишни “рус оилаларини мустаҳкамлаш” истаги билан изоҳлади. Сўровномаларда россияликларнинг учдан бир қисми (33 фоиз) ажрашиш сабабини оилани боқа олмаслик, 15 фоизи ўзаро тушунишнинг йўқлиги, яна 14 фоизи хиёнат ва рашк деб атаган.
