Самарқандда ноҳақ қамоққа ҳукм қилинган 17 ёшли йигит озод қилиниб, ҳукм озодликни чеклаш жазосига ўзгартирилди. Бу ҳақда Болалар омбудсмани хабар қилди.
Қайд этилишича, вояга етмаган, 2008-йилда туғилган Ж.X.га нисбатан 2025-йилнинг 23 июль суд ҳукми билан 1 йил 6 ой муддатга озодликдан чеклаш жазоси тайинланган. Бироқ Ургут туман пробация хизмати томонидан жазо ижро этилмаётгани важи билан ҳужжатлар тайёрланиб, йигитга нисбатан жазони озодликдан маҳрум қилишга ўзгартириш бўйича тақдимнома киритилган.
Ўрганиш давомида Ургут туман судида Жиноят қонуни талабларига номувофиқ равишда, яъни вояга етмаганларга нисбатан жазони алмаштириш кўзда тутилмаганига қарамасдан, йигитга озодликдан маҳрум қилиш тўғрисида ажрим чиқарилгани аниқланган.
Самарқанд вилояти прокуратураси киритган тегишли протестга асосан суднинг мазкур ажрими юқори инстансия суди томонидан бекор қилиниб, Ж.X.га нисбатан озодликдан маҳрум қилиш жазоси озодликни чеклашга ўзгартирилди.
