Қора денгизнинг Туркия қирғоқларига яқин ҳудудда Россияга кетаётган Kairos нефть танкери минага тўқнашиб портлади. Буюк Британия ва Европа Иттифоқи томонидан Россия нефтини ташиганлик учун санкция остига олинган ушбу кема портлаш ва ундан кейин юзага келган ёнғин оқибатида зарар кўрган. Бу ҳақда Туркия денгиз ишлари бош бошқармасига таяниб, “Bloomberg” хабар берди.
Туркия расмийлари худди шундай ҳодиса иккинчи танкер – Virat билан ҳам содир бўлганини маълум қилган. Ҳодиса вақтида иккала кемада ҳам юк бўлмаган. Танкерлар ёрдамига қутқарув кемалари юборилган.
Кемалар ҳаракати мониторинги хизматининг маълумотларига кўра, Kairos Новороссийскдан Ҳиндистоннинг Парадип портига Urals маркали нефть етказиб берганидан сўнг юк ортиш учун Россия портига қайтаётган бўлган. Virat танкери эса Россия нефтини ташиганлик учун АҚШ ва ЕИ санкциялари остида бўлган ва йилнинг катта қисмида Қора денгизнинг ғарбий қисмида тўхтаб турган. Бу АҚШ уни жорий йилнинг 10 январь куни санкция рўйхатига киритганидан кейин юз берган.
Tribeca Shipping маълумотларига кўра, Kairos мина портлашидан кейин чўкиб кетиш хавфи остида қолган. Шу билан бирга, агентликнинг қайд этишича, Босфор бўғози орқали кемалар ҳаракати тўхтамаган ва одатдаги тартибда давом этмоқда.
